انا بحب واحد بقالى سنين فضلت احبه اربع سنين فى صمت وفى الاخر قولت كفانى عبط بقى ولازم ابين الحب دا ويارتنى مابينت حاجة انا منكرش ان انا عشت اجمل سنتين فى حياتى بس بجد كنت بحس انه انسان مريض لو اهتميت بيه يكنسل عليا ولايعبرنى ويعامل البوابة اللى عندهم احسن منى ولو بطلت اعبره يحسسنى ان هو رومىو وانا جوليت بس انا منكرش انى فيا عىوب كتير مش اى حديستحملها وانه اتحمل قلة ادبى عليه كتير اوى بس انا برده استحملت خياناته وبرود اعصابه اللى مفيش واحدة طبيعية تقدر تستحملها بس انا بحب فيه طموحه وحنانه اللى كنت بحسه بعض الاوقات بس فعلا مش قادرة انساه ومش عارفة اشوف حد غيره ساعات كتير بحس انه ابنى مش حبيبى عاوزة اقوله انه وحشنى وانى بحبه اكتر من نفسه لانى من جوايا ورغم اللى عمله حاسة انه يستاهل الحب ده
هناك 51 تعليقًا:
اعتقد الموضوع كله عبارة عن مراهقة
وانت بنفسك هتكتشفي ده بعد فترة من الزمن
بتحبيه من اربع سنين يعني وانت عندك 12 سنة يا مثبت العقل في الراس يا بنتي المفروض حياتك كانت في الوقت ده قلم وكراس مش قلب يحب ويحتاس
مش هاقولك كلام الكبار انك مراهقة ومرحلة وهتعدي والكلام اللي انتي مش عايزة تسمعيه
بس انتي لسه صغننة واحتكاكك بالحياة قليل اكيد خبرتك تقريبا شبه معدومة في الحكم علي الناس
عارف عارف انك 16 سنة بس عقلك يفوق التلاتين مش هاقولك كلنا كنا بنحس بكده علشان اكيد انتي مش عايزة تسمعي كده
من الآخر ومن الآخر خالص ان كنت ناوية تعيشي في عالم الحب ما تخليهوش بهدلة
انتي بنت ... بنوتة صغنونة
ان مالقتيش اللي يعاملك علي انك اميرة ويدللك ويحسسك برقتك يخاف عليك وعلي زعلك يقدر وجودك في حياته
ليكي تاثير السحر عليه يبقي تستني لحد ما الفارس الجميل ده يظهر
هاه حلو الكلام ولا نقول كمان
ههههههههههه
هوا استحمل قلة ادبك وانتى استحملتى خيانته؟
دا حب ايه المنيل دا؟
بصى بقى
طبعا طبعا دا حب مراهقه زى ما قال مصرى بالغربه
اشغلى نفسك بدراستك ومستقبلك وطموحك
ولو عندك وقت فراغ
اهتمى بمدونتك دى
وهاتلاقى نفسك نسيتيه تماما
اهلا بيكى فى عالم التدوين
اولاً : أهلا بيكي في عالم التدوين.
ثانيا بقي: بجد مش عارفه اقولك ايه ، بس انا عن نفسي لو مكانك وقريت كلام حسام انا اكيد كنت اقتنعت .
صدقينى انا بنت وزيك وحاسه اوى باللي بتقولى عليه بس صدقنى لما تكبري شوية هتقولى ..يااااااااه ازاى انا كنت بفكر بالطريقة دى ..
احنا بنحب عشان نعيش أجمل لحظات حياتنا مع حد بيحبنا وبيقدرنا واكتر واحد بيفهمنا... مش عشان ننجرح.
تمنياتي ليكي بكل التوفيق .
مصرى بالغربة
مع احترامى لرايك بس انت اكيد حاسس مشاعرى ومش عارف اتا عملت عشانه ايه ومستعدة اعمل ايه وعاوزة اقولك ان سنه 28 سنة ارجوك ساعدنى بحل اكون مقتنعة بيه
الى حسام
انظر نفس التعليق
انا ح ارد بس اعذروني ايدي بطيئة على الكي بورد شوية
لو بيحبك ما كانش جرحك في أي تصرف وإنتي كمان لو بتحبيه مش هتهينيه حاولي تعيدي حساباتك .
والله حرام... يعني لما حبيتيه كان عندك 12سنه... يعني طفله... وانتي لازلتي طفله...
جربي تشغلي حالك بشي من غير ماتفكري فيه... ولاتدوري غيره... لان لو فيه حب حقيقي حيجي لعندك... الحب مش صناعه...ومجرد ان يدخل التجريح والاهانات في الحب خلاص مايباقاش حب... خصوصا انتي قلتي لما نعامليه كويس يطنشك... ولما تحاولي تنسيه يرجع... يعني لعبة شد ورخي ماينفعش كده...
ابعدي عنه ... وحاولي تلحقي بماتبقى من طفولتك... احسن لا بكره تكبري وتندمي على الوقت اللي ضيعيته ...
والحب الحقيقي حيجي حيجي لوحده... من غير ماندور عليه...
اتمنى لك التوفيق... وراحة البال...
اشكركم جميعا
ماتزعليش من كلامنا
احنا كلنا اكبر منك
ومرينا بتجارب كتير زى تجربتك دى
كلنا حبينا واحنا فى سنك دى
واكتشفنا اننا كنا فى وهم كبير ضيع مننا سننين كتير
انا عارف مشاعرك ايه واحساسك ايه دلوقتى
وعارف انك مش مقتنعه ب ولا كلمه من كلامنا
بس صدقينى كلنا كنا زيك
علشان كدا مش عايزينك تغلطى نفس غلطتنا
يلا بقى سيبك من الموضوع دا وادخلى عالم التدوين ب حاجات جامدة
مستنينك
كل سنه وانتى طيبه
ونورتى عالم التدوين
السلام عليكم
اهلا بيكى فى عالم التدوين
نورتى
الحقيقه انتى لازم تتخذى القرار وتفكرى واعتقد هتعرفى انتى عيزه ايه بالظبط
لان الموضوع ده بالذات لازم تفكرى فيه بهدؤ
بس انا مستغرب من سنك
عموما
ان شاء الله ربنا يهديكى للصالح
متزعليش من كلامى بس اعتبرينا كلنا اخواتك
رمضان كريم
تحياتى
ايه يا شباب هي دلوقت حاسة ان مشكلتها اكبر مشكلة في الدنيا والظاهر عملت مدونة عشان عايزة مشاركة
نشاركها
امممممممممم، كل حاجة بتتنسي الحلو والوحش
بس اشغلي وقتك بالمدونات، اه والله ح تلاقي ناس بتكتب كلام حلو وكلام يفقع وح تلاقي نفسك اتاخدتي في الموضوع ده
والدنيا اتفتحت قدامك
عزيزتي المدونه الجديده..
مرحبا بك في عالم التدويين..
مشاعرك البريئه اتجاه الي بتحبيه..
وزعل وكره وخيانه وحنين ده شيئ طبيعي..
بيحدث لكل البنات..
والي مستغربيين من سنك الصغير
انا اعرف الي كانوا اصغر منك..
وعجبت دوما لامرهن..
لاني كان همي ازاي اخلص مزاكرتي..
ولاكن دائما افتحي عقلك وقلبك لكل جديد..
وانا أأيد ان هذا كله مراهقه..قد تندميين عليها..
وقد تضحكيين منها..
بالتوفيق ..
وفي انتظار جديدك الذي آمل أن يكون بصراحة هذا البوست..
تقبلي مروري
ابنتى الصغيرة على الحب
للاسف مش قادر اقولك كل الكلام اللى المفروض اقوله.. لكن انا عايز اسألك سؤال.. تفتكرى واحد عنده 28 سنة ح يعمل ايه بواحدة عندها 16 سنة يعنى فى عز مراهقتها ..وايه مناسبة انه بيسمع منك كلام على حد وصفك "قلة ادب" ويستحمل ..يعنى انت عايزة تفهمينى انه بيحبك فعلا !!!!!!!
لو سمحتى ياريت تعرفى ياصغيرتى انك فى احرج سن ..وان ما مررت به فى حكم تجربةزى اى تجربة بتمر بها فتاة من سنك اتمنى من الله ان تنتهى وانت بخير
مرحبا بك فى عالم التدوين ووداعا لقصة حبك المبكرة لو اردت السلامة
فعلا الحب بهذلة
تحبية من عمرك 12 سنة
ابنك ذا عبيط
تبري منه واحرميه من الميراث
بس بالصريح
احنا
يوم كان عمرنا 12 حبينا
بس للاسف ما تحبينا
هذا مرض المراهقة
بس تعالي كيف كان يخونك ؟؟؟؟؟؟؟
و ماذا فعلتي من قلة الادب ؟؟؟
يا خرابي
كككككككككككككككككك
هههههههههههههههههههههه
انا صايم
ونشف ريقي
حسبي الله عليكي
ولا حول ولا قوة الا بالله
ياحبيبة قلبى دة غلط
انا عارفة مشاعرك وكلنا بنات مرينا اكيد بتجارب دى
بس اما كبرنا عرفنا ان دة غلط واننا ضيعنا وقت
انا بنصحك كااخت كبيرة وخلى بالك ان دة ممكن يضر بسمعتك كبنت
لازم تهتمى بمذاكرتك اكتر وتشيلي
المواضيع دى دلوقت والعمر ادامك
بس كل شيء له سن معين متستعجليش
وبصراحة حسام عندة حق ممكن يكون قاسي عليكي بس والله كلامة عين العقل
هههههههههههههه
فكرتيني بنفسي من تلات سنين و لا حاجه عشت حالتك دي بس لمدة إسبوع بس الحمد لله بقيت عاقله علي أرض الجنون
بصي اللي بتحسيه عادي
طبيعي
المهم انك تتعلمي من تجاربك دي
كمان حاولي تقربي من ربنا
عشان هو اللي هيساعدك أكتر من أي حد
و زي ما حبيتي الانسان ده ان شاء الله ربنا هو القادر انك تنسيه .. و ان شاء الله تحبي غيره يكون قادر انه يسعدك
و علي فكره الحب الحقيقي عمره ما كان بهدله
لو بهدله بيبقي بهدله في نظر الناس لكن انتي لو بتحبيه بجد .. صدقيني عمرك ما هتجيبي سيرة بهدلة دي خالص
و غير كده هو عمره ما هيضايقك كده لو فعلا ده حب حقيقي ..
و عموما إيميلي ف البروفايل لو تحبي نتكلم .. احنا بنات زي بعض و أكيد أكيد هعرف أفكر معاكي
السلام عليكم
اهلا بيكي في عالم المدونات
معلش انت طلبتي مني رأيي بس انا مش حقولوا دلوقتي
انا عاوز اسألك كام سؤال كده
1- هو انت باباكي فين؟
و ارجوا انك متفهميش السؤال غلط او تستهيفيه ؛ انا قصدي هو مكانه فين في حياتك
2- انتي لما طلبتي رأيي كنت عاوزة رأيي في المشكلة بتاعتك ولا رأيي في طؤيقة كتابتك؟
3-انت مش بتردي على الناس دي كلها ليه؟ ماهو كل واحد قال رأي في منهم الي نصح و فيه منهم الي معجبوش الكلام و اتريق.. ردي عليهم بقى واحد واحد و بعدين في الآخر شوفي كده انت حاسه بايه
اتفقنا!!!
كل سنة وانتى طيبة
عندك حق فعلا
الحب بهدلة وكمان مش اى بهدلة
دى من النوع الغالى
يا صاحبة مدونة براحتك بقى ..
السلام عليكم و رحمة الله ، و اهلا بيكي في عالم التدوين ، و ان بشجعك جدا انك تكتبي و انت صغيرة كده ، قليل اوي لما تلاقي مدونات و يكون اصحابها في هذا السن الصغير ..
عموما بالنسبة لتعليقي على بوست " الحب بهدلة " ، بقوللك حب ايه اللي انت بتقولي عليه :)
يعني كلنا كننا في المرحلة دي من عمرنا ، و كننا بنفكر في الحاجات دي بنفس الطريقة ، و برضه كننا فاكرين ان العاطفة دي - و اسمحيلي هسميها عاطفه لان الحب كلمة معناها اكبر من كده بكتير اوي- اقوي عاطفة في الدنيا ، و لو اتوزعت على كل واحد الدنيا هتعيش في فرح و انبساط كده زي الحواديت ، بس اسحيلي انت عاطفتك دي اتوجهت غلط ..
اقوللك ليه ، اولا هو اكبر منك بكتير اوي ، يعني 28 سنة اكيد بيشتغل ، يعني بيقابل بنات اشكال و الوان ، اكبر منك و انضج منك ، ايه اللي هيجبره انه يعرف واحده في سنك .
الفرق بينكو كبير اوي ،
بالاضافة لكدهانت في سن الوقتي بتبني فيه مستقبلك ، و مش هقوللك كتابك و كراستك ، عقوللك و الشباب الوقتي واعي ، بصي حواليكي ، شوفي الدنيا غالية ازاي ، شوفي الشباب بيكافحوا ازاي عشان العيشة ، شوفي باباكي اد ايه بيتعب عشان يوفر ليكو حياه مستقره و كمبيوتر تدخلي فيه على مدونتك ، شوفي كل ده و اعرفي انك هتبقى واحده من اللي هتدور بيهم عجلة الحياة ، لازم تأسسي لنفسك درع قوي يحفظك من الزمن ، يعني تهتمي بدراستك ، تقري كتب كتير توسع مداركك ، و تنمي ثقافتك ، اقري في كل حاجه و اي حاجه ، انت الوقتي بتبني نفسك ، كل حاجه هتحطيها في الاساس هتفيدك لبعد كده .
و بعدين فيه حاجه انت ناسياها ، او مش واخده بالك منها ، انت لازم تشغلي دماغك بحاجة مفيده ، بمعنى رياضه ، نشاط اجتماعي ، اي حاجه تملا وقت فراغك ، الواحد اللي عنده فراغ بتتوجه عواطفه غلط للاسف .
و بعدين اهم حاجه عاوزة اوصيكي بيها ، انك تعرفي ان ربنا شايفك ، عاوزاكي تراقبيه جل و علا ، يعني تصلي و تقري قران ، و تتعبدي لله ، انت عارفه هيملا قلبك بحب له - جل و علا - و تلاقي الدنيا فجأه ليها طعم تاني، وكل حاجه فجأه هتتغير للاحسن ، انا بقوللك ده عن تجربة ، انا و انا ادك مع فارق السنين كانت امي قافلة علينا دايما ، ما بختلطش بحد ، وكان عندي فراغ ما اقوللكيش ، ما كانش عندنا غير الكتب الدينية اللي كان ممكن اقراها ، فغصب عني وجهت عواطفي للناحية دي ، و لاقيت ا الموضوع قلب معايا بشغف و شوق اني اقرب من ربي ، مش عاوزة اقوللك اني نجحت في دراستي و انا الوقتي مهندسة ، و متزوجة مهندس محترم و راجل كويس ..
و انتهزي فرصه اننا في شهر فضيل واقري قران و شوفي و اسمعي برامج دينية ، و عارفه يا ريت تكوني شوفتي حلقة الاستاذ عمرو خالد بتاعت امبارح ، و اللي تكملتها النهارده القصة عن السيدة مريم ، و ازاي لما وجههت عواطفها لله ، ازاي خللاها افضل نساء العالمين ..
طولت عليكي ، بس حسيت اني لما ارد عليكي عاوزة اكسب اخت ليا ، و ده يشرفني انك تتكلمي معايا و نقدر سوا نحل اي ازمات بتمرري بيها ..
و اخر الكلام سلااااام !!..
اولا كل سنه وانتى طيبه
ثانيا اهلا بيكى فى عالم التدوين
ثالثا بقا وده المهم
قبل ما تكملى تعليقى بسرعه يلا روحى اقرى موضوعين عندى الاول اسمه الحب الاول والتانى اسمه انا مش ندمانه
ها خلاص روحتى قريتيهم
اقولك بقا تعليقى على الموضوع عامة
شوفى يا ست الكل انا مش عاوز اقولك كلام انتى مش هتقتنعى بيه دلوقت بس بعدين ممكن تقتنعى بيه
انتى 16 سنه مش هقولك بقا الكلام اللى معروف انك تجاربك قليله وخبرتك فى الحياه تكاد تكون معدومه بس عاوزك تفكرى باسلوب تانى
تفتكرى هو بيعاملك كأيه؟
حبيبه؟؟ صديقه ؟؟ اخت " صغيره"
انا هسيب الاجابه ليكى
لو افترضنا ان ده مش حب مراهقه افتراض يعنى ... تفتكرى فيه امل بالشكل ده انه يكمل؟
هسيب الاجابه ليكى بردو
هقولك على حاجه ياريت زى ما بيقولوا تحطيها حلقه فى ودنك
الحاجه اللى مش هتكمل لاخرها لو مبدأتيش فيها متبدأيش ولو بدأتى متكمليش لانك عارفه النهايه ايه
لانه كده هتتعبى نفسك وهتتعلقى بحبال دايبه
انا عارف ان كلامى هتقولى عليه انه قاسى شويه وممكن تقولى انى ببالغ شويتين
بس صدقينى لو بعدتى وانشغلتى فى اى حاجه واتعاملتى مع عقليات تانيه هتعرفى معنى كلامى
انا حاسس بيكى وعارف معنى كلامك كويس لانى مريت بالمرحله دى ومتخيل انك ممكن تعملى اى حاجه علشانه بس ده لانك حابسه نفسك فى الموضوع ده ومش شايفه غيره بس هو ممكن يعمل اللى هتعمليه عشانه؟!
اقعدى مع نفسك وفكرى صح وحاولى تبعدى مشاعرك وخلى تفكيرك وعقلك هو اللى يحكم
وعاوز اقولك حاجه على الهامش كده
الواحد بعد سن ال25 بيبقى عاوز واحده كبيره تحسسه بانوثتها وبرجولته علشان كده اسف انى اقولك انه صعب انه يكون متعلق بيكى
هو مجرد انه حاسس انك بتحبيه فمش عاوز يخسرك كل ما هتبعدى هيحاول يقربك وكل ما تكونى قريبه مش هيهتم
نصيحتى ليكى انك تبعدى ومع الوقت هتنسى كل كده ولما تكبرى هتفهمى ايه اللى كان بيحصلك بالظبط وده كان ايه وليه اتعلقتى بيه
اسف للاطاله
علاء
أولا اهلابيكى فى عالم التدوين
ثانيا حاولى تحطى اسم نناديكى بيه مش شرط يكون اسمك ممكن يكون اسمك المستعار
ثالثا خلينا فى موضوعك
انا مش هقلك انك لسه صغير او مراهقه او او او
بس هقولك انك يوم ما اختارتى كنت فعلا صغيره كنت عندك 12 سنه يعنى لسه طفلة فى بداية بدء النضج والتطور
المشاعر غير مستقرة والطموح مش محدد واللى انت حاسيت بيه من اربع سنين ماكنش حب كان مجرد احساس الانوثه لا اكثر احساس بان القلب بدأ مهامه الوظيفية
انتى ممكن تبقى عندك 20 و21 و 22 وما تعرفيش برده تحبى حب حقيقى
بس هقولك حاجه صدقينى هتحسى بيها بعدين اول ما تتخلصى من الموضوع دا لما تمرى عليكى سنتين تانيين يعنى يكون عندك 18 وتدخلى الجامعه هتعرفى ان مش الشخص دا اللى ممكن يشاركك حياتك جايز لا اكيد هيقابلك شخص جديد هتحسى فيه انه طموحك الحقيقى
انتى الوقتى بتقولى انك حنين وطموح انتى دلوقتى ما تعرفيش معنى الطموح الحقيقى ولو هو شخص طموح فعلا كان طمح فيكى وحس انك ممكن تكون نجاح بالنسبه لى
انا خلصت بس هديكى نصيحه تمشى عليها طول حياتك لما تيجى تحبى
خلى كرامتك وكبريائك فى كل اعتبار
تحياتى لك واهلا بيك
.....................
سندريلا
رومانسى
يمكن ان انت اكتر واحد حسيت بيا بس انا عاوزة اعرف رايك ايه
نيجار
انا بجد بحبه ومقدرش اعيش من غيره
فارس بلا جواد
اشكرك على اهتمامك بيا وبجد كلامك عجبنى بس انا محتاجة لرايك بجد لانى مش عارفة افكر
وميض ابنسامة
بس انا بحبه بجد ومش عارفة اعمل ايه ارجوك ساعدنى
عاقلة على ارض الجنون
احنا
بنات زى بعض واكيد انتى حاسة بللى بقوله انا عايشه بس ميتة لان بقالنا اربع شهور مكلمناش بعض ارجوكى ساعدينى
اولا : كل سنه وأنتي بالف خير ورمضان كريم
ثانيا / الحب إلي مش بيقوم علي الحب والتفاهم والأحترام يبقي مش حب ، يبقي لعب عيال صغيره ، أنتي بتقولي أنه استحمل اذيتك له وأنتي استحملتي خيانته ، يعني من الأخر أنتوا الأتنين مقطعين بعض
ثالثا : الحب الحقيقي هو الحب إلي تحسي فيه بأن الشخص محترمك وبيقدرك وميقدرش يتخلي عنك ويصونك وعمره ما يخونك ، ويقدر يفتح بيت ويقدر يقف قدام العالم كله علشانك ويقدر يروح لوالدك ويتقدملك
لو هو يعرف يعمل الحاجات دي يبقي راجل تمام ولو ميعرفش يبقي يشد اللحاف وينام أحسن ههههههههه
علي فكرة
انا مش مستغرب أنك تحبي في السن ده ، لأن الأعلام والتلفزيون خلي العيال تعرف كل حاجه حتي وهي في اللفه ، يعني متستغربش لو لقيتي ولد في اللفه ماش مع بنت في اللفه هههههههههه
تقبلي كلماتي
مجنووون
براحتك بقى
أولا أهلا بيكي بعالم التدوين
ثانيا ده غـــلــــــــــــــــط
اسأليني ليش وشو هو الغلط
يا حبيبتي هاد الحكي غلط
مش الحب هو الغلط
بالعكس الحب شي كتير حلو وفي قمه الروعه والانسانيه بس مو بهاد الوقت
الكل سبقني وقلك هاي مجرد مراهقه والكل صادق بهالحكي
مش معناه اني انا مش مراهقه ومش ممكن احب
بس والله نصيحه لوجه الله انسي الموضوع حتى لو كان نسيانه صعب
يعني انتي فكري بعقلانية هل من المعقول شب عمره 28 سنه يحب بنت بهاد العمر
يعني اتني لازم تنظري لحالك اكتر وبلا ما تضيعي احلى سنين من عمرك بشي عابث ما منه فائده
وبعدين من أولها قلة ادب وخيانه شو خليتو للأيام الجاية
حرام عليكم يا ناس ادنيا أكبر من هيك
وانتي لسه ما شفتي من الحياة
الايام جاية ورح تعلمك أشياء كتيرة تخليكي تضحكي على حالك لمجرد انك عملتي هيك
انتي اشغلي حالك بأشياء تستفيدي منها
مش معنى هاد الحكي انه الحب شي مسخرة
بالعكس ، بس الايام رح تثبتلك انه اللي انتي فيه مجرد مراهقه مش اكتر
تحيتي لك
تقبلي مروري
عبث
عزيزتي
لا تيأسي فالحب أسمي شيء في الوجود ولكن أعطي قلبك لمن يستحقه وعلي فكره لو رحتي مدونتي هاتلاقي حاجات بتحكي نفس اللي انتي بتقوليه كلها حصلتلي وبرغم كدا انا في انتظارها
أهلا بيكي وكل سنه وانتي طيبه
بندق
شكرا على اهتمامك بيا بس بجد انا يهمنى رايك
عايش ولكن
اشكرك على تقديرك واهتمامك
سندريلا
اكيد انتى حاسة باللى انا حاسة بيه واكيد عارفة ان الحب شى لا ارادى
أستنى على قلبك الصغنن ده شويه وبلاش تبهدليه بدرى اوى كده
بكره تدخلى الجامعه وتشوفى ناس أشكال وألوان الكويس والوحش والغنى والفقير وكل الاشكال
أستنى على قلبك ياحبيبتى لان الحب فعلا بهدله وأسمعى كلام حسام
بنوتي الحلوه
انا محترمه مشاعرك
بس يابنتي ده مش حب
لآن اللي بيحب حد مابيبهدلوش
والابيزله انت لاقيتي مشاعر جديده
وحد مهتم بيكي وبيسمعك اتشديتي
واعجبتي بيه والمراهقه اللي جواكي اللي هي مش عيب قالت لك تعالي نجرب
بس العيب ان الانسان مايقدرش يعمل الصح
ولو سمعتي كلام المراهقه اللي جواكي كل مره تشوفي فيها حد يعجبك
هتحصل لك مشكله مع نفسك ولما تكبري
وتقبلي الحب الحقيقي
مش هتستمتعي بيه خالص
وتجاربك الفاشله السابقه هتتحكم فيكي
وتفسد المشاعر الحقيقيه الناضجه
احتفظي بمشاعرك للي يستاهلها
واجلي الموضوع ده الي ان تنضجي
واستمتعي بسنك اللي هو سن الزهور
عارفه ليه سموه كده لآن فترة المراهقه هي اقصر مرحله في سن الانسان
معلش طولت عليكي
ربنا يحفظك
أهم حاجة
أحب اهنيكي علة مدونك الجديدة
و ارحب بيكي ف عالم التدوين
و كون ان اول موضوع يبقى فيه تلاتين رد و انا الواحد و تلاتين اهو
فده يعتبر إنجاز
أنا مش بقر على فكرة
أنا بحسد بس :)
الحاجة التانيه
انتي فعلا لسه صغيرة قوي و بدري عليكي و الحياه قدامك
أكبر منك و بيحبوا و بعدين يفوقا و يعرفوا ان لسه بدري عليهم
فما بالك ببنوتة حلوة عندها 16 سنة؟؟
و بتحب من و هي عندها 12 سنة؟؟
ركزي ف حياتك و كل شيء بيجي ف أوان
تشرفت بزيارة مدونتك
سلام
امير البلانكو
علفكرة المدونة بتاعتك جامدة اوى وبشكرك على اهتمامك بيا
شمس النهار
اولا اشكرك على اهتمامك بيا ثانيا انا عاوزة ان حبى بجد لانى بحس انه بيجرى فى دمى مش قادرة اوصفلك مشاعرى اكتر من كده
:)))
جميلتي الجميلة
ذات الأحاسيــــــس المرهفة
عارفة ؟؟؟
أنا مش هلومك "ومش عايزة حد يخانقني" لأن اللي لمسته فيكي..رومانسيتك البريئة
اللي لسه ما اتلوثتش..برغم الجرح..لكن إنتي لسه جميلة بدليل إنك لسه بتحبيه و بتحني ليه
هقولك على حاجة
أنا بس جيت متأخر و حاسة الكلام هيكون مكرر جدا جدا
أنا عايزة أتكلم معاكي على انفراد الصراحة
:))))))))))))
الفكرة يا حبيبتي إننا فعلا وإحنا في سنك حبينا و اتحبينا
و حلمنا بورد و نجوم و فراشااااات
و صحينا من نومنا متأخرين شوية
مجروحين كتير
متألمين أكتر
بصي حبيبتي
كل حاجة ليها وقتها
الحزن ليه وقته المحدووووود جدا في حياتك
اشغلي وقتك أكتر وأكتر
حاولي تنسيه...هو شاب كبير جدا و إنتي قلتي...خياناته...!
و كلام منك مش لطيف في حقه..طب بذمتك..إنتي ترضي تتجوزي راجل هوزؤ ؟؟؟
لسانك اتعود على الغلط فيه..فمش هيتعدل للأسف
و هو اتعود يخونك ببرووووود
اللي يحب...ما يجرحش حبيبه يا قلبي
حطي دايما في بالك..مادام جاله قلب يجرحك مرة هيجرحك ألف مرة
وإنتي كاتباها أهو
"براحتك بقى"
بالظبط...براحته..هو الخسران لقلب بريء مخلص زي قلبك
في حاجة كمان..البنوتة اللي في سنك
قلبها ملياااااان حـــــــــب
طيب
حبيت مرة..اتجرحت
حبيت التانية..اتجرحت
التالتة...
اتجوزت ....مش هتعرفي وقتها تحبي جوزك للأسف
ليه...؟
لأن الحب اللي كان مالي قلبك..استهلكتيه كله...خلص
و جه عند حلالك..وقال شطبت
صدقيني..كلنا خايفين عليكي جدااااا من جرح مؤلم...و كانا نصيحتنا ليكي
إنك تنسي الشاب ده تماما
عيشي ملكة...مش أي حد يقدر ينول قلبها..خليكي غالية في عين نفسك عشان تبقي أغلى في عين الناس
إوعي تفكري تكلميه..دي أهم نصيحة بقولهالك
إوعيييييييي
و إوعي تزعلي من بندق...أنا فاهمة قصده كويس...هو بيتكلم عن الفراغ اللي في حياتك...هل بسببه اتجهتي للبحث عن الحب بره ؟؟؟؟
صحيح هي مش قاعدة...ولكن ممكن تكون سبب
المهم
أنا دوشتك...لكن يهمني أطمن عليكي دايما
أرجووكي
ما تستسلميش
و ميرسي جدا لزيارتك مدونتي المتواضعة
أنا كمان مستنية رأيك
: ))))
ايميلي ف البروفايل لو حابه نتكلم ..
معنديش مانع يمكن انا محدش كان جمبي و انا ف سنك و يمكن أبقي انا اللي جمبك دلوقتي
ياسمين
ساعات بيبقى الحلم اجمل بكتير من الواقع اللى بنعيشه ومهما خسرنا اكيد كسبنا ولو جزء بسيط
تحياتى :)
"انا بحب واحد بقالى سنين فضلت احبه اربع سنين "
هههههههههههههههههههههه
انا فاهم اقصدك بس الجمله تضحك
"كفانى عبط بقى ولازم ابين الحب دا"
هو الواحد ده عنده كام سنه وانتى كان ساعتها عندك كام سنه ؟
انتى صارحتيه من سنتين ....يعنى كان عمرك 14 سنه!
صدقينى كل ده حب مراهقه حتى ولو حساه اوى ....
كلمة مراهقه مش كلمه عيب او حاجه تخليكى تزعلى ....دى فتره عمريه تتسم بالاندفاع مع نقص الخبره طبعا وكلنا مرينا بيها ...انا كنت مراهق
لو مشينا ورا احاسيسنا فى الفتره دى كان الواحد زمانه متجوزه اكتر من واحده.
وانا منصحكيش انك ترتبطى بشاب او تبينيله وانت فى السن ده وهو اكيد برضو لسه مش بيفكر فعلا فى الجواز
حتى فكرى فيها من ناحيه دينيه واسألى
واهلا فى التدوين
وكل سنه وانتى طيبه
مممممم ..
اقوللك رأبيي ؟؟؟
بصي انا عارفه انك بتحبيه و متعلقه بيه كتير و هوه اكيد تعلقه بيكي بسبب اهتمامك بيه .. مفيش بنت في سنك محصلش ده معاها و لو مين قاللك ايه هتفضلي مقتنعه انك بتحبيه وان اللي انتي حاسه بيه ده حب .. مش عارفه بس هقوللك
الحياه مراحل ..
و اللي انتي فيه ده انبهار و اتعلقتي بيه بحكم العاده ..
شوفي الناس الكبار اسأليهم يعني ايه حب ؟
والله هيقوللك انهم مش عارفين ..
عاشو مشاعر كتيير ترجموها غلط زي ما نتي ترجمتي مشاعرك ..
ايوة عارفه هتقوليلي انك بتحبيه ..
ماشي ممكن تكوني بتحبيه بس عارفه ..
مش قصدي حاجه بس .. هييجي يوم لكا تكبري شويه و تضحكي علي نفسك و تقولي " ايه اللي انا كنت بعمله ده " يمكن مش هتصدقيني دلوقتي بس لما تكبري هتقولي قيل و قال ..
ممممممم .. و انا شايفه انو لو بيحبك و هو كبير بالمناسبه يبقي لازم يخاف عليكي و يخاف علي مستقبلك و لو مش بيحاول يسعدك يبقي مش بيحبك
ربنا يوفقك
و الحب بهدله فعلا مش هزار
سلام عليكم
ما تسبقيش الاحداث
محدش يستاهل حبك غير الانسان اللى يطلب ايدك من بابكى و يكون صريح مع اهلك
اتق الله فى مشاعرك يرزقك واحد يحبك ويحترمك بيعيوبك و بميزاتك
اما اللى انتى بتعمليه ده فسابق لاوانه
و حاجة ممكن تندمى عليها بعد كده
انسيه واشغلى وقتك بحاجة مفيدة
بصي هأقولك على رأيي .. بلاش نقول نصيحة خليها رأي و خلاص .. انتي لسه صغيرة أويييييييي .. بلاش تضيعي على نفسك فرص قد تكون أفضل .. بصي احنا كلنا في السن ده مشاعرنا هي اللي بتسوقنا من أول ثانوي لحد ما نخلص الجامعة .. بيبقى النضج قليل أوي و المشاعر هي الأساس ... علشان كده معظم حالات الحب دي بتفشل إلا إستثناءات بسيطة يمكن بيكون عندهم نضج إستثنائي أو الظروف بتجبرهم إنهم يكملوا.. بس القاعدة هي عدم النجاح .. رأيي إنك تصبري شوية و اشغلي نفسك بعالم المدونات زي ما نوارة نصحتك .. و بكره تفتكري قصة الحب دي و تقعدي تضحكي على نفسك زي ما نضحك كلنا على نفسنا و احنا بنفتكر قصة الحب الهبلة بتاعة إبتدائي و إحنا لسه عيال
اولا اهلا بيكى مدونة زميلة
ثانيا مش هاقولك انتى كنتى صغيرة او مراهقة او اى حاجة بس هاقولك
ان فيه مرحلة بيتفجر فيها احساسنا بذاتن وكيانا وبنكون عايزين نحب ونتحب ونحس بتلك اللذة التى تغذينا بفكرتها طوال حياتنا من الافلام والاغانى بس بعد كدة بتمر علينا سنين وبنحس اننا اتسرعنا فى تسليم قلوبنا العذراء لاول طارق
راجعى نفسك والحل هاييجى من جواكى
رمضان كريم
hello
it is nice to see ur blog
am 16 too
وكنت عايز اقولك ان 16 سنة ده حب وهمى
اما تحبى كده اصبرى على نفسك ومتبينييش حبك
بعد كام اسبوع وسعات كام يوم
الاحساس بيضيع وبتنسى كل حاجة لان ده سن المشاعر الغير مستقرة
اتمنى نكون اصدقاء
سلام
نصيحتي في موضوع زي ده زي عدمها .. لأني بالظبط كما يدعو أحدهم عروساً لحضور مأتم قريب .. رأيي مكنتش عايز أقوله .. لكن قد ينفع
رأيي ونصيحتي .. وليه تحب دلوقتي؟ .. ليه منفهمش نفسنا .. البنت صاحبة البوست مراهقة .. طب ما تستمتعي بالحب يا آنستي بدون قيده .. مش مفهوم .. الحب شعور .. وقيد الحب كائن مرتبط بيه .. ليه منعملش اكتفاء ذاتي؟ وخصوصاً اننا عارفين ان في المرحلة العمرية دي احنا لا نبحث عن استقرار .. نستمتع بشعورنا بالحب .. ونطرد الكائن المقترن بالحب من حياتنا؟؟!!
أنا مش رافض الحب .. مفيش حد يقدر يرفض شئ لا يملك فيه اختيار .. أؤمن به تماماً .. تعرضتله .. وبرحب بيه .. أهلاً وسهلاً بيه في أي وقت .. أعتبره أسمى المشاعر .. وأصدق العواطف .. ومن أمتع ما بالحياه .. لكن أنا موقفي منه زي موقفي من أي قيد .. ادور وشي الناحيه التانيه وأسيبه وأمشي
الرسول (ص) أحب السيدة خديجة حباً عظيماً .. وكان يرفض ويغضب إذا ذكرت بما يقلل من قدرها حتى بعد وفاتها بسنوات كثيرة .. وكان يغضب من عائشة رضي الله عنها التي كان يحبها أيضاً حبا شديداً إذا ذكرت السيدة خديجة رضي الله عنها بما يكره.
الحب .. الوفاء .. كل هذه مشاعر جميلة أؤمن بها .. وأتمنى أن أنعم بها
لكن قيد الحب هو ما أرفضه رفضاً باتاً .. أنا معنديش استعداد أي حاجه تغير الطريقة اللي أستمتع بها بحياتي .. الطريقة التي أعيشها .. والتي لا تتناسب مطلقاً مع 99.9% من البنات أو الزوجات.
أحب أهلاً وسهلاً .. مش بمزاجي .. لو حصل هرحب بيه كما أرحب بأي مصيبة أو سوء يحصللي .. وكما أرحب بأي حادث سعيد يحدث لي وأحتفل به .. لكن هل يتملكني؟ أرجو الله تعالى أن لا يمكنه مني .. أبداً
نصيحتي هتبقى نصيحة روبرت دي نيرو في هييت
Heat
متخليش في حياتك حاجه متقدرش تدور وشك وتسيبها وتمشي في ثانيه (غير الأهل والأصدقاء دي أنا أضيفها علشان الاستمتاع بالحياه) .. زوجة وأولاد والكلام ده كله أنا مقدرش عليه
نصيحتي للي عايز يستمتع بشبابه .. خليك خفيف .. حر
يمكن في مرحله جايه تفرض الطبيعة العمرية على الانسان انه يبحث عن الاستقرار .. لكني لا أبحث عنه .. ولا عايزه .. على الأقل في المرحلة الحالية (24 سنه)
حبيت آه .. بحب آه .. وبعدين؟ حلو .. عادي .. طظ .. أي حاجه .. الشعور مش بايدي .. لكن القيد على جثتي :D
السلام عليكم..
ازيك..؟
كل سنه وانتى طيبه..
اسفه ان كنت جيت من غير دعوه..لكن لقيتك بتدعى الساده المدونين قلت اتفسح فى مدونتك شويه ههههههههههه..
اولا انا عاوزاكى تعبترينى اختك الكبيره الصغيره اللى انتى تحدديه بقى..او صحبتك حتى..
بصى يا ستى بالنسبه لموضوع الحب..
انا عاوزاكى بس تسألى نفسك سؤال..
انتى بتقولى هو بيستهين بيكى فى بعض الاوقات..وبنفضلك..
ممكن تسالى نفسك بقى هو بينفضلك ليه..؟
يعنى هو عنده 28 سنه..وانتى 14 سنه..
يعنى فى فارق فى السن..
مش هقول انه كبير عليكى..
لكن لا انتى هتقدرى تفهميه ولا هو هيقدر يفهمك..واراهنك وتراهنينى ان كنتم قضيتم كل العلاقه خناق وزعل واختلافات..
انا عارفه ان الحب بييجى فى اى وقت وزمان ومكان..
بس احنا برده بايدينا نخلى الحب ده فى مرحله احنا نقدر عليها..
فى مرحله محدش يقدر يستهين بينا فيها..نقدر نحكم فيها انا بعمل صح وللا غلط..انا بفكر بطريقه صح وللا لأ..
اقدر احدد هو بيحبنى وللا لأه..
لو بيحبك صدقينى هيحترمك..
ولو بيحترمك مش هيرضى عليكى انه ينفضلك او يبنى معاكى علاقة حب وانتى 14 سنه..
اقوللك على حل..؟
هو فى كل الحالات الحل ده مضمون 100%
انتى تتقلى على الآخر..يعنى متظهريش اى مشاعر نهائى حتى لو انتى حاسه تجاه بأى شئ..حتى لو انتى هتموتى لاقدر الله وتعبرى عن مشاعرك دى..متبينيهاش..أبداً..
حسسيه انه فى حياتك انتهى او على الاقل بدأتى تفتقديه..وقربتى تنسيه..
شوفى رد فعله هيكون معاكى ايه..
وقوليلى..
دمتى سالمه وكل عام وانتى بخير..
حبيبتى الضغنطوطه
ازيك ياجميله
اهلا بيكى مدونه صديقه جميله ويارب تنجح مدونتك كده وتبقى مشهورة
ثانيا بقى بخصوص موضوعك
كتير اتقالك د مشاعر مراهقه وهتعدى
وبعدين هتحسى انك كنتى عايشه وهم
شوفى ياجميله
اولا انا اتصدمت لما قلتى انه عنده 28 سنه وانتى 16
حيبيبتى انا معاكى مصدقه مشاعرك جدا
عارفه انك لما بتقول مقدرش اعيش من غيره ده حقيقه لانك فضلتى ماسكه على حبه 4 سنين وده دليل اخلاص منك
لكن حبيبتى انتى قلتى انك اتحملتى خيانته
طيب حبيبتى انتى اول ماعرفتيه اساسا وحبيتيه كان عنده 24 سنه
يعنى خبره فى كل حاجه هو شاب ليه حكاياته ومعنى انه يخونك ده معناه انه عايش حيياه خاصه بيه
اعترافك ليه بحبك خلاه يحس انه ملك متوج وفرح بحب البنوته الصغيرة الجميله ليه
علشان كده لما بتقربى بيصدك علشان يعلقك بيه اكتر ولما بتبعدى بيجرى وراكى لانه مش عايز يخسر قلب بيحبه يقدر يرضى بيه غروره
كلامى يمكن يزعلك لكنه نظرة اكبر منك شويه وخبرة عنك شويه
لما يكون هو عنده 28 سنه ده معناه انه كبير وعارف هو بيعمل ايه مش حاجه بتخرج منه بعفويه زيك
يعنى اللى انتى بتسميه خانه ليك دى تصرفات مقصوده منه وهو حاببها وبيعملها علشان يعيش فتره شباب حلوة فى حياته
نصيحتى ياجميله مش هقولك انسيه لان الكلام سهل بس الفعل صعب اوى اوى اوى
لكن هقولك اختبريه
ابعدى اوى اوى اقدرى على نفسك وابعدى
وراهنيه على بعدك ده لو ماعملش كذا كذا وكذا
يعن حطى نفسك عنده فى كفه وفى الكف التانيه حاجه غاليه قوى عليه وشوفى هيختار ايه ؟
رد فعله مع صلابتك هتعرفك انتى فين منه؟
ياترى بيلعب بيكى ومبسوط بحبك ليه ولا هو بجد عاوزك؟؟؟
وهخلى توقعى للى هيحصل بينى وبين نفسى لحد ماالاقيكى جايه تقوليلى النتيجه
بس ياريت تكونى انتى واثقه من اجابته
منوره البلوج سبوت كله ياقمرى
ارق تحياتى ليكى
ورمضان كرم
لو كان ما ذكرتيه صحيح فاسمحي لي ان اقول مع كامل احترامي لمشاعرك و اراء المعلقين ان مثل هذه العلاقة غير صحيحة و حتي في المجتمعات الاكثر انفتاحا و حرية في علاقات الحب و الغرام فان رجل في الثامنة و العشرون من عمره يكون طرفا في علاقة حب (حتي لو كان حب برئ)مع فتاة قاصر يوصف بانه بيدوفيل
(pedophile )
و يجرم قانونا بتهمة التغرير بقاصر و التحرش بقاصر و هي تهم عقوبتها السجن و وضع اسمه علي قائمة المتحرشين بالاطفال المعلنة كما يمنع من اي عمل فيه احتكاك بالاطفال. هذا ما يحدث في امريكا المنفتحة جنسيا و ذلك بغرض حماية الاطفال القصر من الاستفلال العاطفي او الجنسي.
لا استطيع ان اخفي صدمتي من الاراء التي اغفلت هذه النقطة و ان كان هناك اي دلالة لذلك فهي ان الوعي بثقافة حماية الطفل يحتاج من المسؤلين و من الاعلام في مصر لجهود كبيرة في ظل التغيرات الاجتماعية و المعلوماتية سريعة الايقاع.
السلام عليكم
انا مش عارفة ارد اقول اية غير ان الى انتى بتعملية دة اولا مينفعش كمثال واحدة مسلمة وصراحة انا ليا صديقة مقربة جدا جدا
عملت زيك كدة بالضبط
والله العظيم تعامل الناس الى حوليها اتغير انا شخصيا زعلت منها جدا جدا
واهلها معدوش بيثقوا فيها
والله انتى لازم تراجعى نفسك
مفيش اى حد فى الدنيا دى ابدا يستاهل التضحية علشانة
واخر كلامى الى انى بتعملى دة مينفعش خالص
دة راى وممكن يكون لكى راى تانى بس حطى قدامك على طول (اتقى الله )
وان شاء الله لما تكبرى ربنا يوعدك بالى احسن منة وتتجوزى جوازة جميلة وتحبى جوزك فى الحلال
ارجوكى متديئيش من تعليقى بس انا وانتى بنات وانا عارفة احساس البنت لما بتحب
بس لازم تعيشى واقع الامر
هقول اية ربنا يهديك
وكل رمضان وانتى بخير
(ارجوكى فكرى كويس لحسن تقعى ولما تقعى مش هتلاقى الى يقومك )
والله هتتعبى فى حياتك الى جاية اوى بسبب كدة اتقى الله واستغفرى ربك وربنا كريم والله وارجوا تشريفك مدونتى يمكن تفيدك بحاجة
السلام عليكم
الله يخليكى اوعى تزعلى منى ابدا
انا بنت زى زيك
وكلامك دو خوفنى عليكى اوى
يلا اشغلى وقتك بحاجات مفيدة انا عارفة ان كلامى مش هيعجبك وانا اساسا اصغر منك بسنتين
فكرى بعقلك مش بقلبك وزى ما انتى قلتى الحب بهدلة
بصي بقى الحب دي مشاعر تلقائية لايمكن ان يتحكم احد فيها ولا اطلب منك ان تبدأي بجلد نفسك كما فعل الكثيرون منا ههنا بالعكس اطلقي مشاعر حبك لكن لتكن نهاية هذه المشاعر عند قلبك الذي بين اضلعك كم من البنات شعرت بمشاعر اعجاب نحو مدرس او شخص مقرب اكبر منها سنا لكن ان تتعدى هذه المشاعر حدود قلبك وتتحول الى علاقة هنا يجب ان ندق ناقوس الخطر الف مرة وللحديث ههنا وجهين الوجه الأول تخيلي انكم تزوجتم عارفه لما هيكون عندك 35 سنه هيكون عنده كام 48 يعني انت في عز الشباب وهو في بداية سن الكهولة انت عارفه لما يطلع معاش انت هيكون عندك كام سنه 48 سنة ده ينفع يكون بابا اخ كبير لكن حبيب لا
الوجه الثاني لو فعلا في علاقة وهو موافق عليها اعرفي ان هذا الشخص لايستحق منك اي مشاعر لأن زي ماقالت pink ده بمقاييس العالم المتحضر جريمة اما لو كانت العلاقة علاقة من بعيد لبعيد ومشاعر الأعجاب فقط في قلبك دون اي علاقة فهذا شيئ طبيعي تمتعي به دون ان تتعدي الحدود
اولا اعرفك بنفسى احمد الشاعر انا متفق معاهم فى الرأى وحاولى ما تحكيش الحكاية دى لحد عشان انتى لسة صغنتتة وبعدين كل واحد مر بنفس الظروف ولد او بنت بس انتى اللى عواطفك زايدة شوية ودى امرها سهل حاولى بالحب الزايد دة تديه لماما ولبابا تحبى اخواتك حل بسيطواتمنى لكى التوفيق
احمد الشاعر
معلش اسمحولس كلكم أنا عندي مداخلة مهمة جدا
كلكم أو معظمكم ركز على فرق السن أنا شخصيا مش بحبذ أبدا الفرق اللي أكتر من 5 سنوات بين الزوجين
لكن محدش ينكر إن في جوازات كتيييييير في عائلاتنا كلنا بين الزوجين 13-15 سنة
صح ؟؟؟؟
ومعظمها جوازات ناجحة
إحنا ما اتكلمناش عن إن البنت قاصر و الشاب كامل الأهلية-أو فاقدها- إحنا اتكلمنا عن مشاعر
محدش أبدااا يقدر يحسبها صح وقت ما قلبه يميل
براحتك بقى
يا ريت تردي علينا و تناقشينا
مادام طلبتي رأينا و لبينا دعوتك وجينا
لازم تقدري ده و تبدي شيء من الاهتمام بالردود دي
حتى عشان نطمن عليكي
بصراحه ومتزعليش من رأيى الحب دا مش بهدله دى مشاعر لسه مستقرتش على شيء ممكن تكون مراهقه لأن سنك صغير خالص على كل دا
ومش معنى كدا ان مفيش حب حقيقى او انى بجرح فيكى ابدا لكن متستعجليش شيء
بكره تكبرى وتحكمى بنفسك وهتشوفى ان أرائنا اقرب للصح
لو فى انسان بيخون او بيتحمل الاهانه مش معناه ان كل دا بسبب الحب
الحب ملهوش علاقه ببرود الاعصاب والخيانه
انا كان نفسى تكتبى هو كمان سنه قد ايه علشان نقدر نفكر صح
لانه لو سنه من سنك بصراحه مش هلاقى تعبير ادق من لعب عيال . واعزرينى في التعبير دا
ولو اكبر منك هيبقى مجرد مراهقه احلام بأنك تلاقى الحب وتحبى وتتحبى من شخص ناضج وكل دا مشاعر مراهقه هتزول مع مرور الوقت
اعتبرى الجزء دا تحديث !!!!!
ايه دا انا قريت الردود وقريت انك كتبتى ان عمره 28 سنه لا والله بتهزرى هههههههههههه
دا انتى كدا بتحبى فيه والدك او اخوكى الكبير مش الحب اللي هينتهى بالارتباط
عايزه اقول شيء انا مقتنعه بيه بس ويا ريت لو تفكرى فيه للحظه
كل شيء فى اوانه جميل زي الزرع تماما
لو قطفتى شيء من شجرته قبل اوانه هيكون مر كذلك كل شيء فى حياتنا بنحاول نجربه قبل اوانه
فكرى وربنا معاكى ويعينك على نفسك
إرسال تعليق